Kinumpirma ng Commission on Human Rights (CHR) na binawasan ng Department of Budget and Management (DBM) ang kanilang confidential funds para sa susunod na taon.
Sa pagtalakay ng panukalang budget sa Senado, sinabi ni CHR Chairman Richard Palpal-Latoc na mula sa hiling nilang ₱4 milyon, ₱1 milyon lamang ang ibinigay ng DBM bilang confidential fund ng ahensya.
Ayon kay Palpal-Latoc, bagaman kasalukuyang walang “persons at risk” o mga indibidwal na nasa ilalim ng proteksyon ng CHR, kailangan pa rin ng pondo upang makapaghanda kung sakaling tumaas ang bilang ng mga taong nangangailangan ng proteksyon.
Ipinaalala naman ni Senador Sherwin Gatchalian na karaniwang ginagamit ang confidential funds para sa surveillance o intelligence gathering kaugnay ng mga banta sa seguridad.
Subalit paliwanag ni Palpal-Latoc, ginagamit ng CHR ang confidential fund para sa information gathering, mga dayalogo sa iba’t ibang sektor, at paghahanda sa pagresolba ng mga human rights issues.
