Hiniling ng Department of Public Works and Highways (DPWH) sa Department of Justice (DOJ) na isailalim sa immigration lookout ang dati nilang pinuno na si Manuel Bonoan at iba pang personalidad.
Kaugnay ito ng imbestigasyon ng DPWH sa mga ghost at substandard na flood control projects.
Sa liham kay Justice Secretary Jesus Crispin Remulla, inirekomenda ni DPWH Secretary Vince Dizon na mag-isyu ng Immigration Lookout Bulletin Order (ILBO) laban kina Bonoan at Candaba Mayor Rene Maglanque, gayundin sa mga opisyal ng MBB Global Properties Corporation na sina Macy Monique Maglanque (president), Sunshine Bernardo (corporate secretary), at Fatima Gay Dela Cruz (treasurer).
Ginawa ni Dizon ang request matapos iugnay ni Senador Panfilo Lacson si Bonoan kay Maglanque, na sinasabing contractor ng multi-billion peso flood control projects.
