Dalawang Chinese Warships ang nakitang nakamasid sa 14th Multilateral Maritime Cooperative Activity sa West Philippine Sea malapit sa Bajo De Masinloc, nitong Lunes ng hapon.
Ayon kay Captain Adrian Vargas, Executive Officer ng BRP Teresa Magbanua, bigla na lamang lumitaw ang warships ng People’s Liberation Army Navy bagamat hindi lumalapit sa kanilang operation box.
Nilinaw naman ni Vargas na wala silang natanggap na radio challenge at tila nagmamasid lang ang Chinese vessels sa aktibidad.
Nagpatuloy ang joint exercises sa pagitan ng Pilipinas, Estados Unidos at Australia bilang bahagi ng pagpapalakas ng regional alliances.
