Agad na nasagip ang dalawang mangingisda matapos bumangga ang bangka sa isang tugboat sa karagatang sakop ng Caballo Island malapit sa Corregidor Island.
Sa report ng Philippine Coast Guard (PCG), sakay ang dalawang mangingisda ng fishing banca J. Berman ng mabangga sila sa Malaysian-flagged tugboat Atlantic 6.
Ito’y habang nagsasagawa ng towing operations ang tugboat kung saan hatak-hatak nito ang Barge Atlantic 7.
Mabilis na tumulong ang mga kapwa mangingisda na nagkataon naroroon rin sa nasabing karagatan bago lumubog ang kanilang bangka.
Nagkusa naman ang tugboat Atlantic 6 na ihatid sa anchorage area ang hindi na pinangalang mga mangingisda na nasa maayos na kalagayan saka sila isinakay sa ibang bangka. —sa ulat ni Felix Laban
